لاہور (سپورٹس رپورٹر) چیئرمین پاکستان کرکٹ بورڈ محسن نقوی کی خصوصی دعوت پر وہیل چیئرکرکٹ ٹیم کے کھلاڑیوں نے قذافی سٹیڈیم میںملاقات کی ۔ملاقات کرنیوالوں میں وہیل چیئر کرکٹ کونسل کی چیئرپرسن رخسانہ راجپوت، وہیل چیئر کرکٹ ٹیم کے کپتان محمد ذیشان، نائب کپتان عمران آرائیں ، بیٹسمین سید ارسلان احمد، وکٹ کیپر بیٹر معظم نواز اور دنیا کے تیز ترین باولر محمد فیاض شامل تھے۔ اس موقع پر چیئرمین پی سی بی محسن نقوی نے کھلاڑیوں کو ایشین چیمپئن شپ جیتنے پر مبارکباد دی اور کارکردگی کو سراہا تے ہوئے کھلاڑیوں کی بھرپور حوصلہ افزائی کی اور 15 لاکھ روپے کا چیک دیا ۔ محسن نقوی نے کہا وہیل چیئر کرکٹ ٹیم کی کامیابیوں پر دلی خوشی ہوئی ہے،پی سی بی وہیل چیئرکرکٹ ٹیم کی سپورٹ جاری رکھے گا۔امید ہے کہ وہیل چیئرکرکٹ ٹیم آئندہ بھی ٹورنامنٹس جیت کر پاکستان کا نام روشن کرے گی۔