اسلام آباد (خبر نگار) چیئرمین سینٹ سید یوسف رضا گیلانی کی خصوصی دعوت پر روس کی فیڈریشن کونسل کی فیڈرل اسمبلی کی چئیرپرسن ویلنٹینا ماٹویینکو پاکستان پہنچ گئیں۔ روس کی اعلیٰ ترین شخصیت کے ہمراہ فیڈرل کونسل کی فیڈرل اسمبلی کے اراکین بھی وفد میں شامل ہیں۔ نور خان ائیر بیس پر سینٹ کے ڈپٹی چیئرمین سیدال خان اور سینیٹر برائے مہمان داری سینیٹر بشریٰ انجم بٹ نے روسی وفد کا استقبال کیا۔ دورے کے دوران اعلیٰ سطح ملاقاتیں  اور مصروفیات بھی پروگرام میں شامل ہیں۔ روس کی فیڈریشن کونسل کی فیڈرل اسمبلی کی چئیرپرسن محترمہ ویلنٹیناماٹویینکو کی سربراہی میں روسی وفد چیئرمین سینٹ سید یوسف رضا گیلانی کے علاوہ صدر مملکت آصف علی زرداری، وزیر اعظم شہباز شریف، سپیکر قومی اسمبلی سردار ایاز صادق سے ملاقاتیں کرے گا۔ روس کی فیڈریشن کونسل کی فیڈرل اسمبلی کی چئیرپرسن محترمہ ویلنٹینا ماٹویینکو پیر کو سینٹ کے خصوصی اجلاس سے بھی خطاب کریں گی۔