بلاول‘ نواز شریف ملاقات سے وزراء بوکھلاہٹ کا شکار ہیں: عدنان ہنجرا

لاہور (پ ر) مسلم لیگ (ن) لاہور کے رہنما ممبر میڈیا کمیٹی پی پی 149 سے سیکرٹری اطلاعات کے امیدوار چودھری عدنان اصغر ہنجرا نے کہا ہے کہ بلاول بھٹو زرداری اور میاں نواز شریف کی ملاقات سے حکومتی وزراء بوکھلاہٹ کا شکار ہو چکے ہیں۔ نواز شریف کی سیاست کو ختم تصور کرنے والے احمقوں کی جنت میں رہتے ہیں۔ ان کو یہ معلوم نہیں کہ نواز شریف آج بھی پاکستان کے مقبول ترین لیڈر ہیں۔ پاکستان میں جمہوریت کی بالادستی اور اسکے استحکام کے لئے پاکستان کی دو بڑی سیاسی جماعتوں کے سربراہان نے میثاق جمہوریت کے عمل کو آگے بڑھانے کا جو مضبوط فیصلہ کیا ہے وہ خوش آئند ہے اس سے جمہوریت کو تقویت ملے گی۔ یہ اس بات کا مثبت ثبوت ہے کہ ملک کی بڑی دونوں جماعتوں کے سربراہان نے ماضی کی تمام تر غلطیوں سے سبق سیکھ لیا ہے اور وہ آئندہ ایک دوسرے کیخلاف کوئی ایسا اقدام نہیں کرنا چاہیں گے جس سے جمہوریت کو نقصان پہنچے اور کوئی فوجی آمر جمہوریت پر شب خون نہ مار سکے۔