پاکستان نوجوان نے بھارت کو شکست دیکر اخروٹ توڑنے کا عالمی ریکارڈ بنا لیا

کراچی(نوائے وقت رپورٹ) گنیز ورلڈ ریکارڈ نے سر سے اخروٹ توڑنے کے مقابلے میں بھارت کے نوین کمار کو شکست دینے والے پاکستان کے محمد راشد کا ریکارڈ سازمقابلہ اپلوڈ کر دیا۔ گنیز بک آف ورلڈ ریکارڈ کے لیے اٹلی کے مشہور ٹی وی شو لانوتی دای ریکارڈ میں کراچی سے تعلق رکھنے والے پاکستانی کھلاڑی محمد راشد نے بھارتی کھلاڑی کے 239 کے مقابلے میں سر سے 254 اخروٹ توڑ کر نیا ریکارڈ قائم کیا تھا۔ گنیز بک آف ورلڈ ریکارڈ نے اس تاریخ ساز مقابلے کی ویڈیو اپنے سوشل میڈیا اکائونٹس پر اپ لوڈ کردی جو دیکھتے ہی دیکھتے وائرل ہو گئی اور محض ایک گھنٹے میں ویڈیو کو 4 لاکھ افراد نے دیکھا اور محمد راشد کو داد دیئے بغیر نہ رہ سکے۔ کراچی سے تعلق رکھنے والے مارشل آرٹ کے کھلاڑی محمد راشد اب تک 60 ورلڈ ریکارڈ بنا چکے ہیں جبکہ ان کی اکیڈمی کے ریکارڈز کی تعداد 75 ہوچکی ہے۔