تصور حسین پلگمیا کے مرکزی، محمد سلیم احمد ساؤتھ کے چیئرمین منتخب

کراچی (کامرس رپورٹر) تصور حسین بٹ کثرت رائے سے پاکستان لیدر گارمنٹس مینوفیکچررز اینڈ ایکسپورٹرز ایسو سی ایشن (پلیگمیا) کے مرکزی چیئرمین برائے سال 2021-22کیلئے منتخب ہوگئے، جس کا فیصلہ 20 ویں نو منتخب مرکزی ایگزیکٹیو کمیٹی میں ہوا۔ کمیٹی ممبران نے سبکدوش ہونے والے چیئرمین دانش خان کی خدمات اور ان کے اقدامات کا بھرپور خیر مقدم کیا۔ کمیٹی نے راشد ارشد ظہور کو بطور سینئر نائب چیئرمین اور کاشف رحیم کو نائب چیئرمین منتخب کر لیا۔ تصور حسین بٹ پہلی مرتبہ پلگمیا  کے مرکزی چیئرمین منتخب ہوئے ہیں۔ اس کا اعلان ایسو سی ایشن کے 19ویں سالانہ اجلاس عام میں کیا گیا۔ جس کی صدارت چیئرمین دانش خان نے کی۔ مرکزی چیئرمین تصور حسین نے ممبران سے کہا کہ کورونا کے باعث پیدا ہونے والے معاشی بحران سے ملک گزر رہا ہے، پیداواری لاگت میں بے پناہ اضافہ، حکومت کے تعاون سے ٹیکس،ٹیرف اور پالیسی ریٹ میں بہتری کی ضرورت ہے۔