اسلام آباد (خبرنگار خصوصی) پاکستان ٹیلی ویژن کارپوریشن ہیڈ کوارٹر میں ظہیر الدین بابر پر ڈرامہ سیریل تیار کرنے پر ایکسپرٹ ورکنگ گروپ کا اجلاس گزشتہ روز منعقد ہوا۔ ظہیر الدین بابر پر ڈرامہ سیریل بنانے کا مقصد وسطی ایشیا  (ازبکستان) اور جنوبی ایشیا (پاکستان) کے درمیان تاریخی تعلقات دکھانا ہے۔ یہ سیریل نوجوانوں کو ظہیر الدین بابر کے بطور ایک اچھے سیاستدان، ان کی فوجی ٹیکنالوجی، خواتین کے احترام اور ان کے شاعرانہ پہلو کے بارے میں بصیرت فراہم کرے گا۔ ایکسپرٹ ورکنگ گروپ نے اس ڈرامہ کی وسعت پر تبادلہ خیال کیا۔ اس سیریل کا پس منظر پاکستان اور ازبکستان کے درمیان مشترکات اور شناخت کو ظاہر کرنا ہے۔ پی ٹی وی کی ٹیم پروڈکشن ڈیزائن، بجٹ، مقامات، آلات اور اقساط کی تقسیم پر کام کر رہی ہے۔