لاہور(کلچرل رپورٹر) فلمسٹارصائمہ نور نے کہا ہے کہ باکس آفس پر فلم کو کامیابی تب ملے گی جب فلم شائقین کو روٹین سے ہٹ کر کچھ دکھایا جائے گا۔ نئے ٹیلنٹ کا کام دیکھ کر خوشی ہوتی ہے‘ نوجوان فلم میکر اچھی اورمیعاری فلمیں پروڈیوس کررہے ہیں۔ 
نسیم بیگم کی51 ویں برسی کل منائی جائے گی
لاہور(کلچرل رپورٹر)پاکستان فلم انڈسٹری کی نامور گلوکارہ نسیم بیگم کی51 ویں برسی کل 29 ستمبر کو منائی جائے گی‘وہ 29ستمبر 1971 کو اس جہاں فانی کوچ کرگئیں تھیں۔
ان کی خوبصورت آواز آج بھی لوگوں کے کانوں میں رس گھول رہی ہے۔امرتسر میں 1936میں پیدا ہونے والی گلوکارہ نسیم بیگم نے موسیقی کی ابتدائی تعلیم کلاسیکل گلوکارہ فریدہ خانم کی بڑی بہن مختار بیگم سے حاصل کی جبکہ 1958 میں اپنے فنی سفر کا آغاز کیا۔نسیم بیگم نے ویسے تو بہت سی فلموں میں اپنی آواز کا جادو جگایا مگر فلم” مادرِ وطن” کیلئے گایا ہوا گیت ”اے راہ حق کے شہیدوں” قومی نغمے کی حیثیت اختیار کرگیا۔نسیم بیگم نے اپنے فنی سفر کے دوران چار نگار ایوارڈز حاصل کئے۔ نامور گلوکارہ 29ستمبر 1971 کو اس جہاں فانی کوچ کرگئیں مگر مداحوں کے دلوں میں وہ آج بھی زندہ ہیں۔