اردن نے شام سے منشیات لے کر آنے والے 2 ڈرون مار گرائے

عمان(این این آئی )اردن کی فوج نے منگل کے روزشام سے منشیات لے کر آنے والے دو ڈرون مار گرائے ۔غیرملکی خبررساں ادارے کے مطابق اردنی فوج نے ایک بیان میں کہا کہ ڈرون اس کی حدود میں داخل ہوئے تھے اور ان پر کرسٹل میتھ ایمفیٹامین کی کھیپ لدی ہوئی تھی۔ اس نے خبردار کیا ہے کہ وہ ملک کی سلامتی کو غیر مستحکم کرنے کی کسی بھی کوشش کو روکنے کے لیے طاقت کے ساتھ کارروائی کرے گی۔اردنی حکام کا کہنا تھا کہ منشیات، ہتھیاروں اور دھماکا خیز مواد لے جانے والے ڈرونز کے بڑھتے ہوئے استعمال نے سرحد پار اربوں ڈالر کی منشیات کی جنگ میں ایک نئی جہت کا اضافہ کیا ہے۔اردن نے نے جنوبی شام میں موجود ملیشیاں پر ڈرونز کے ذریعے منشیات کی اسمگلنگ کا الزام عاید کیا ہے۔