صوبہ خیبرپختونخوا کے مشیر اطلاعات بیرسٹر سیف نے کہا ہے کہ عمران خان کی رہائی کا فیصلہ کن معرکہ شروع ہو چکا ہے۔ اپنے ایک بیان میں انہوں نے کہا کہ راولپنڈی احتجاج کے لئے تمام تر تیاریاں مکمل ہیں، عوام کا ٹھاٹھیں مارتا سمندر علی امین گنڈا پور کی سربراہی میں راولپنڈی سے ٹکرائے گا، پرامن احتجاج ریکارڈ کرانے جا رہے ہیں، راج کماری مریم نواز پولیس گردی کی کوشش نہ کریں بصورت دیگر پورا پاکستان سڑکوں پر ہوگا، جعلی مقدمات اور فارم 47 کی جعلی حکومت کے خاتمے تک احتجاج کا سلسلہ جاری رہے گا کیوں کہ جعلی حکومت سے نجات دلانا اب فرض بن چکا ہے۔
دوسری طرف پاکستان تحریک انصاف کے احتجاج کے پیش نظرانتظامیہ نے لیاقت باغ کو سیل کر دیا، راولپنڈی کے اہم مقامات بھی سیل کرتے ہوئے داخلی راستے بند اور بھاری نفری تعینات کردی گئی، راولپنڈی میں آج موبائل سروس بھی جزوی بند رکھی جائے گی، لیاقت باغ کے گیٹ کو رکاوٹیں کھڑی کرکے اور خاردار تاریں لگا دی گئیں، کسی قسم کی ٹریفک شہر میں داخل نہیں ہو سکتی جب کہ راستے بند ہونے سے شہریوں کو مشکلات کا سامنا ہے بتایا گیا ہے کہ پولیس کے ہزاروں اہل کار مختلف مقامات پر تعینات کردئیے گئے ہیں، مری روڈ کے اطراف اور مری روڈ سے لیاقت باغ جانے والے راستے بھی کنٹینرز لگا کر بند کر دیئے گئے، پولیس کی بھاری نفری کو لیاقت باغ کے اندر اور باہر تعینات کرکے چہل قدمی کیلئے آنے والے افراد کو بھی لیاقت باغ سے باہر نکال دیا گیا، راولپنڈی شہر بھر میں دفعہ 144 نافذ نافذ کردی گئی ہے، جس کے تحت کسی بھی قسم کے جلسے، اجتماع یا دھرنے کے علاوہ اسلحہ کی نمائش پر بھی پابندی ہوگی۔ معلوم ہوا ہے کہ مری روڈ کو فیض آباد کے مقام پر کنٹینر رکھ کر بلاک کر دیا گیا، راولپنڈی صدر سٹیشن تا آئی جے پی سٹیشن تک میٹروبس سروس مکمل طور پر بند رہے گی جبکہ اسلام آباد کی حدود میں آئی جے پی سٹیشن سے پاک سیکرٹریٹ تک میٹرو بس سروس فعال رہے گی، میٹرو بس سروس بھی جزوی طور پر معطل کر دی گئی ہے، لیاقت روڈ پر ناشتہ شاپس اور تندورکو بھی بند کر دیا گیا ہے، پولیس کے ساتھ آنسو گیس کے بھاری شیلز سے لیس اہلکار بھی تعینات کردئیے گئے ہیں، میٹرو بس اسٹیشنوں پر بھی پولیس تعینات کردی گئی ہے، راولپنڈی شہر میں بائیکیا موٹر سائیکل سروس بھی دستیاب نہیں، مری روڈ پر داخل ہونے والی چھوٹی چھوٹی گلیاں ریڑھے خار دار تاروں سے سیل کردئیے گئے ہیں