سالوں کا بہنوئی اوراسکے 3بھائیوں پرحملہ‘ایک قتل

لاہور (نامہ نگار)سبزہ زار کے علاقے میں معمولی تلخ کلامی پر سالوں نے چھریوں سے  وار کر کے بہنوئی اور اس کے 3بھائیوں کو شدید زخمی جبکہ ایک بھائی کو قتل کر دیاہے۔پولیس نے4ملزم کو گرفتار کر کے تفتیش شروع کردی ہے۔تفصیلات کے مطابق سبزہ زار کے رہائشی نوید کا اپنی بیوی کے ساتھ کسی بات پر جھگڑا ہو گیا۔ جس پر اس کی بیوی نے اپنے بھائیوں کو بلایا، بھائی تصوراور محمود اپنے 3 دوستوں کے ہمراہ آئے اورجھگڑا شروع کر دیا اور نوید اور اس کے 3بھائیوں تنویر ، صغیر اور نبیل کو چھری سے وار کر کے شدید زخمی کر دیا۔چاروں زخمی بھائیوں کو طبی امداد کے لیے ہسپتال منتقل کیا گیا۔ جہاں تنویر زخموں کی تاب نہ لاتے ہوئے دم توڑ گیا جبکہ دو زخمی بھائیوں کی حالت تشویشناک بتائی جاتی ہے۔پولیس نے ملزم تصور ،محمود اور ان کے 2ساتھیوں کو گرفتار کر لیا ہے۔