ایکسز کلب نے شوبز اسٹارز کوشکست دیکر فائنل کوالیفائی کرلیا

کراچی (نیوز رپورٹر) ایکسز کرکٹ کلب نے شوبز اسٹارز کو 81 رنز سے شکست دیکر ورچوئل ایکسز رمضان فیسٹول ٹی ٹوئنٹی نائٹ کرکٹ ٹورنامنٹ کے فائنل میں رسائی حاصل کرلی جہاں اس کا سامنا کراچی ویٹرنز الیون سے ہوگا۔ حکومت سندھ کی جانب سے کوویڈ19 کی ایس او پی کے تحت آؤٹ ڈور اسپورٹس پر پابندی عائد کئے جانے کی وجہ سے آج(بدھ)کو اے سی سی اور کراچی فرینڈز ویٹرنز کلب کے درمیان شیڈول  فائنل ملتوی کردیاگیا۔تفصیلات کے مطابق ایکسز کرکٹ کلب کے زیر اہتمام اصغر علی شاہ اسٹیڈیم میں ورچوئل ایکسز رمضان فیسٹول ٹی ٹوئنٹی نائٹ کرکٹ ٹورنامنٹ کا دوسرا سیمی فائنل ایکسز سی سی اور شوبز اسٹار الیون کے درمیان کھیلا گیا۔ اے سی سی کے کپتان خواجہ احمد مستقیم نے ٹاس جیت کر پہلے بیٹنگ کرنے کا فیصلہ تو ابتدا میں ان فارم بیٹسمین عثمان شاہ سمیت 67 رنز پر تین وکٹیں گرنے کے باعث ان کی ٹیم مشکلات کا شکار نظر ائی تاہم چوتھی وکٹ کی شراکت میں سہیل خان اور محمد طاہر کے درمیان بننے والے  178رنز میچ کا ٹرننگ پوائنٹ ثابت ہوا جس کے باعث ایکسز سی سی 3وکٹوں کے نقصان 245رنز کا ہدف دینے میں کامیاب رہی، محمد طاہر 43گیندوں کا سامنا کرتے ہوئے 11بلند وبالا چھکوں اور دو چوکوں کی مدد سے 111رنز پر جبکہ سہیل خان 48گیندوں پر تین چھکوں اور 12چوکوں کی مدد سے 102رنز پر ناقابل شکست رہے۔شوبز اسٹار کے سرفراز کے علاوہ کوئی دوسرا بالر متاثر کن کارکردگی نہ دیکھا سکا، سرفراز تین اوور میں 28رنز کے عوض دو وکٹیں حاصل کرنے میں کامیاب رہے، ہدف کے تعاقب میں شوبز اسٹار الیون کی وکٹیں وقفے وقفے سے گرتی رہیں اور 164/8تک محدود رہی، نعمان حبیب اور اولمپیئن سمیر حسین نے مشکل حالات اور سخت دباؤ میں اپنی ٹیم کو سہارا دینے کی کوشش کی تاہم علی عمر اور خواجہ احمد مستقیم کی بالنگ کے سامنے ان کی مزاحمت بھی ان کے ٹیم کے کام نہ آئی، سمیر حسین 29رنز بناکر آؤٹ ہوگئے جبکہ نعمان حبیب میچ کے اخری اوور کی آخری گیند پر اپنی ففٹی مکمل کرکے ناقابل شکست رہے۔ خواجہ احمد مستقیم اور علی عمر نے دو دو وکٹیں حاصل کی، محمد طاہر اور سہیل خان مشترکہ طور پر میچ کے بہترین کھلاڑی قرار پائے جبکہ اسپورٹس جرنلسٹس ایسوسی ایشن سندھ (سجاس) کے صدر آصف خان نے سیمی فائنل کے مہمان خاص خواجہ احمد مستقیم کو یادگاری شیلڈ پیش کی۔میچ کے اختتام پر ٹورنامنٹ کے چیف آرگنائزر خواجہ احمد مستقیم نے حکومت سندھ کی جانب سے کوویڈ19کی ایس او پی کے تحت آؤٹ ڈور اسپورٹس پر مکمل پابندی عائد کیئے جانے کے باعث ٹورنامنٹ کا فائنل ملتوی کردیا  ، نئی تاریخ کا اعلان کوویڈ19کی صورتحال اور ایس او پی کو مدنظر رکھتے ہوئے عید کے بعد کیا جائے گا۔