کراچی (نیوز رپورٹر)  ٹائمز ہائر ایجوکیشن کی جانب سے جاری کردہ رینکنگ کے مطابق جناح سندھ میڈیکل یونیورسٹی پاکستان کی میڈیکل جامعات اور سندھ کی سرکاری جامعات میں سر فہرست ہے۔ برطانیہ کی ٹائمز ہائر ایجوکیشن (ٹی ایچ ای)کی جانب سے امپیکٹ رینکنگ2022 جاری کردی گئی جس کے مطابق جناح سندھ میڈیکل یونیورسٹی پاکستان کی میڈیکل جامعات میں سر فہرست ہے، اس کیساتھ ساتھ سندھ کی سرکاری جامعات میں بھی جے ایس ایم یو سب سے آگے ہے، ٹی ایچ ای کی رینکنگ میں پاکستان کی 63 نجی و سرکاری جامعات کو شامل کیا گیا جس میں جناح سندھ میڈیکل یونیورسٹی کا درجہ 12 واں رہا۔ اس رینکنگ میں دنیا بھر سے ایک ہزار سے زائد جامعات کو شامل کیاگیا جس میں جے ایس ایم یو 601 پوزیشن پر رہی، جے ایس ایم یو کیساتھ سندھ سے صرف دیگر 2 اور جامعات ہیں جو اس پوزیشن پر آئیں۔ ٹی ایچ ای کی امپیکٹ رینکنگ میں ڈاؤ میڈیکل یونیورسٹی، این ای ڈی یونیورسٹی، داود انجینئرنگ یونیورسٹی، راولپنڈی میڈیکل یونیورسٹی، زرعی یونیورسٹی فیصل آباد، قائد اعظم یونیورسٹی و دیگر جامعات کو بھی شامل کیا گیا ہے۔ جناح سندھ میڈیکل یونیورسٹی کے وائس چانسلر پروفیسر امجد سراج میمن نے کہا کہ ٹائمز رینکنگ میں جے ایس ایم یو کا پاکستان کی میڈیکل جامعات اور سندھ کی سرکاری جامعات میں سر فہرست آنا اس امر کی نشاندہی کرتا ہے کہ یونیورسٹی کی کارکردگی درست سمت پر گامزن ہے، آئندہ برسوں میں یونیورسٹی اپنی کارکردگی مزید بہتر بنائے گی، انہوں نے کیو ای سی کے ڈائریکٹر ڈاکٹر واحد عثمانی اور ان کی ٹیم کو یہ سنگ میل عبور کرنے پر مبارکباد پیش کی اور ان کی محنت و لگن کو سراہا، ساتھ ہی یونیورسٹی کے دیگر شعبہ جات کی بھی تعریف کی۔