گیری کرسٹن، جیسن گلیسپی ہیڈ، اظہر محمود قومی ٹیم کے اسسٹنٹ کوچ مقرر

 لاہور (سپورٹس رپورٹر)پاکستان کرکٹ بورڈ نے سابق جنوبی افریقی کرکٹر گیری کرسٹن کو پاکستان کی وائٹ بال ٹیم کا ہیڈ کوچ جبکہ سابق آسٹریلین فاسٹ بولر جیسن گلیسپی کو ریڈ بال ٹیم کا ہیڈ کوچ مقرر کر دیا۔چیئرمین پی سی بی محسن نقوی نے اظہر محمود کے ہمراہ پریس کانفرنس کرتے ہوئے بتایا کہ جیسن گلیسپی کو پاکستان کی ٹیسٹ ٹیم کا کوچ لا رہے ہیں جبکہ جنوبی افریقہ کے گیری کرسٹن قومی وائٹ بال ٹیم کے کوچ ہوں گے۔ ان کوچز کا آنا اس بات کا ثبوت ہے کہ انہیں ہمارے پوٹینشل پر اعتماد ہے۔ اظہر محمود دونوں فارمیٹ کے اسسٹنٹ کوچ ہوں گے۔ یہ وائٹ بال اور ریڈ بال کرکٹ ٹیموں کو جوڑیں گے۔ تقرری کے عمل سے گزرتے ہوئے یہ تینوں تقرریاں 2 سال کی مدت کیلئے کی گئی ہیں۔ پاکستان کرکٹ ٹیم کیلئے یہ تینوں تقرریاں 2 سال کی مدت کیلئے کی گئی ہیں۔گیری کرسٹن انڈین پریمیئر لیگ میں اپنی اسائنمنٹ مکمل کرنے کے فوراً بعد پاکستان کرکٹ ٹیم کی ذمہ داری سنبھالیں گے جس میں آئندہ آئی سی سی مینز ٹی 20 ورلڈ کپ 2024 اور دیگر دو طرفہ وائٹ بال سیریز شامل ہیں۔گیری کرسٹن آئندہ سال پاکستان میں ہونیوالی آئی سی سی چیمپئنز ٹرافی 2025، اے سی سی ٹی ٹوئنٹی ایشیا کپ 2025 اور 2026 میں انڈیا اور سری لنکا میں ہونیوالے آئی سی سی مینز ٹی ٹوئنٹی ورلڈ کپ میں بھی پاکستان ٹیم کے انچارج ہوں گے۔ جیسن گلیسپی اگست میں آئی سی سی ورلڈ ٹیسٹ چیمپئن شپ کے سلسلے میں بنگلہ دیش کیخلاف ہوم سیریز میں اپنی ذمہ داری کا آغاز کریں گے۔ جس کے بعد 2024-25کے سیزن میں انگلینڈ کیخلاف اکتوبر میں ہوم سیریز اور دسمبر میں جنوبی افریقہ کے دورے میں وہ ٹیم کے ساتھ ہونگے۔ محسن نقوی نے میڈیا سے گفتگو کرتے ہوئے کہا کہ میں جیسن گلیسپی اور گیری کرسٹن کو پاکستان مینز کرکٹ ٹیم کے بالترتیب ریڈ اور وائٹ بال کے ہیڈ کوچ کے طور پر تقرری پر مبارکباد پیش کرتا ہوں، ان کے شاندار ٹریک ریکارڈز سب کے سامنے ہیں اور میں پاکستان کرکٹ فیملی میں ان کا گرم جوشی کے ساتھ استقبال کرتا ہوں۔میں اظہر محمود کی پاکستان کرکٹ ٹیم کے سیٹ اپ میں کل وقتی بنیاد پر واپسی کا خیرمقدم کرتا ہوں جو پہلے بولنگ کوچ اور پھر نیوزی لینڈ کیخلاف سیریز کیلئے عبوری ہیڈ کوچ کے طور پر خدمات انجام دے چکے ہیں۔ انہوں نے کہا ویمن کرکٹ ٹیم کے کوچ بھی لارہے ہیں۔