سرگودھا یونیورسٹی میں فٹ بال میچ کے دوران جھگڑا‘ 10 کھلاڑی زخمی

سرگودھا (نمائندہ خصوصی) سرگودھا یونیورسٹی میں ہائر ایجوکیشن کمشن کے زیر اہتمام منعقدہ چیمپئن شپ میں پاکستان بھر کی16جامعات کی فٹ بال ٹیموں نے شرکت کی۔ میچ کے دوران سرگودھا اور مردان کی ٹیموں  کے کھلاڑیوں کے درمیاں معمولی تلخ کلامی پر جھگڑا ہوگیا جس کے باعث فٹبال کا میدان جنگ میں تبدیل ہوگیا۔ دونوں ٹیموں کے کھلاڑیوں نے ایک دوسرے پر ڈندوں، لاتوں اور گھونسوں کی بارش کر دی جس کے باعث 10 کھلاڑی زخمی ہو گئے۔ یونیورسٹی سکیورٹی  سے حالات کنٹرول نہ ہوئے تو انہوں نے پولیس کو طلب کر لیا جس پر پولیس نے موقع پر پہنچ کر حالات کو کنٹرول اور ریسکیو ٹیم کو اطلاع دی جنہوں نے موقع پر پہنچ کر زخمی کھلاڑیوں کو طبی امداد فراہم کی۔ تھانہ ساجد شہید پولیس  کا کہنا ہے  لڑائی کرنے والے کھلاڑیوں کے خلاف قانون کے مطابق کارروائی ہو گی جبکہ یونیورسٹی انتظامیہ کا کسی قسم کا موقف سامنے نہیں آیا۔