تمبولا(حافظ محمد عمران/نمائندہ سپورٹس)پاکستان کرکٹ ٹیم سری لنکا کے شہر تمبولا پہنچ گئی ہے جہاں پاکستان اور سری لنکا کے درمیان جاری ون ڈے سیریز کا تیسرا اور فیصلہ کن میچ کھیلا جانا ہے۔ پاکستانی کھلاڑیوں نے گذشتہ روز یہاں پہنچ کر پریکٹس سیشن میں حصّہ لیا اور میچ کی تیاریوں میں مصروف رہی۔ مایہ ناز آف سپنر سعید اجمل بھی ٹیم کے ساتھ ہیں اور اُنھوں نے پریکٹس میں بھرپور حصہ لیا۔ ٹیم منیجر معین خان نے نوائے وقت/وقت نیوز سے خصوصی گفتگو کرتے ہوئے کہا کہ تمام کھلاڑی تیسرے ون ڈے میں اچھی کارکردگی دکھانے کے لیے بے چین ہیں اور پُرامید ہیں کہ پاکستان تیسرا ون ڈے جیت کر سیریز بھی جیت لے گا۔ سعید اجمل کے حوالے سے گفتگو کرتے ہوئے معین خان نے کہا کہ سعید اجمل کی ٹیم میں شمولیت کا فیصلہ پچ دیکھ کر کریں گے۔