29لاکھ کے ڈاکے، 4 کاریں، 12 موٹر سائیکل چوری

لاہور/ فیروزوالہ (نامہ نگاران) مختلف علاقوں میں وارداتوں کے دوران شہریوں سے لاکھوں مالیت کی نقدی، طلائی زیورات، موبائل فون، گاڑیاں، موٹر سائیکلیں اور دیگر سامان لوٹ لیا گیا۔ ڈاکوؤں نے ہنجروال میں انور علی کے گھر گھس کر اہلخانہ کو گن پوائنٹ پر یرغمال بنا کر 8 لاکھ مالیت، غازی آباد میں حنیف کے گھر سے4 لاکھ مالیت کی نقدی، طلائی زیورات، موبائل فون اور دیگر سامان، مصطفی ٹائون میں کرن سے 3 لاکھ مالیت کی نقدی، طلائی زیورات اور موبائل فون، باغبانپورہ میں افضل سٹور سے3 لاکھ روپے، کاہنہ میں معید کے میڈیکل سٹور سے 70 ہزار روپے اور موبائل فون، اچھرہ میں شہباز سے دولاکھ 20 ہزار روپے، ستوکتلہ میں طارق سے ایک لاکھ روپے اور موبائل فون، پرانی انارکلی میں زوار سے ہزاروں روپے نقدی، موبائل فون اور موٹر سائیکل، شالیمار میں عامر سے50ہزار روپے اور موبائل فون اور موٹر سائیکل، گرین ٹائون میں کاشف سے 25 ہزار روپے اور موبائل فون لوٹ لیا ہے۔ چوروں نے فیصل ٹائون میں سلطان، نصیر آباد میں صفدر، ڈیفنس سے نصراللہ کی کاریں جبکہ غالب مارکیٹ میں سے حسن، جنوبی چھائونی میں اسرار، مزنگ میں وقار، لٹن روڈ میں عادل، موچی گیٹ میں ارسلان، ٹبی سٹی میں عدیل، جوہر ٹائون میں سے فیضان اور نصرکی موٹر سائیکلیں چوری کر لی ہیں۔ فیروزوالا سے نامہ نگار کے مطابق جی ٹی روڈ کی آبادی مبارک آباد (مریدکے) میں ڈاکوئوں نے موٹر سائیکل سوار زبیر احمد سے 85 ہزار روپے اور موبائل چھین لئے اور ثناء اللہ سے موٹر سائیکل نقدی چھین لی۔ مزید برآں زمیندار مالک کے گھر داخل ہو کر پانچ لاکھ روپے مالیت کے زیورات، نقدی لوٹ کر لے گئے۔ نامعلوم افراد نے اسد علی، شہزاد احمد، یٰسین کی موٹر سائیکلیں اور اکرم کی کار چوری ہو گئی۔ پولیس نے مقدمات درج کر لئے ہیں۔