این ای ڈی کے سو برس مکمل  یادگاری سکہ اور ڈاک ٹکٹ جاری

کراچی (نیوز رپورٹر) این ای ڈی یونی ورسٹی کے 100 برس مکمل ہونے پر حکومتِ پاکستان کی جانب سے سو روپے کے یادگاری سکے اور 20 روپے کے یادگاری ڈاک ٹکٹ کے اجرا کی تقریب کا انعقاد آج ہوگا جس کے مہمانِ خصوصی جامعہ سے فارغ التحصیل سول انجینیئر، وزیراعلی سندھ سید مراد علی شاہ ہوں گے۔ جامعہ ترجمان کے مطابق 29 اگست 1921 کو پرنس آف ویلز کالج کا قیام عمل میں لایا گیا تھا، بعد ازاں اس کا نام تبدیل کرکے نادر شاہ اڈلجی ڈنشا کے نام کی مناسبت سے این ای ڈی رکھا گیا۔ کورونا صورت حال کے سبب مختصر تقریب کا انعقاد سٹی کیمپس میں کیا جارہا ہے جب کہ دنیا بھر سے انجینئرز آن لائن تقریب میں شرکت کریں گے۔ شیخ الجامعہ این ای ڈی پروفیسر ڈاکٹر سروش حشمت لودھی نے خصوصی پیغام دیتے ہوئے کہا کہ حکومتِ پاکستان کی جانب سے اس یادگاری سکے اور ڈاک ٹکٹ کا اجرا خوش آئند ہے۔ اس موقعے پر انہوں نے جامعہ سے وابستہ ہر فرد کو ادارے کی ترقی میں اپنا اپنا کردار ادا کرنے پر سراہا۔ انہوں نے مزید کہا کہ ہم انجینئرنگ سیکٹر میں جدید تعلیم و ٹیکنالوجی کے خواہاں ہیں، یہی وجہ ہے کہ ہمارا انجینئر ملکی و بین الاقوامی سطح پر مستند شمار کیا جاتا ہے۔ شیخ الجامعہ نے آئندہ کے لیے پرعزم ہوتے ہوئے کہا کہ ہم اس برس تھر انسٹی ٹیوٹ میں سول انجینئرنگ کے داخلوں کا آغاز کررہے ہیں تاکہ مزید قابل انجینئرز دنیا بھر میں جامعہ کا نام روشن کرسکیں۔