لاہور+اسلام آباد(سپورٹس رپورٹر+خبرنگار خصوصی) مصحف سکواش کمپلیکس اسلام آباد میں پی ایس ایف کومبیکس انٹرنیشنل سکواش ٹورنامنٹ اختتام پذیر ہو گیا۔ ترجمان پاک فضائیہ کے مطابق پاکستان سکواش فیڈریشن نے پاک فضائیہ کے تعاون سے انٹرنیشنل سکواش ٹورنامنٹ کا انعقاد کروایا۔12 ہزار ڈالر کی انعامی رقم رکھی گئی۔ مصر، ملائیشیا، ایران اور پاکستان سے سکواش کے 24 کھلاڑیوں نے حصہ لیا۔ ائیر مارشل ذوالفقار احمد قریشی،ہلال امتیاز (ملٹری)، ڈپٹی چیف آف دی ائیر سٹاف (ٹریننگ)، ائیر فورس نے اختتامی تقریب میں بطور مہمان خصوصی شرکت کی اور کھلاڑیوں کو ٹرافیاں اور نقد انعاما ت سے نوازا۔ کھلاڑیوں کو بین الاقوامی معیار کی تربیت اور کوچنگ کی سہولیات فراہم کرنے پر پاکستان سکواش فیڈریشن کی کاوشوں کو سراہتے ہوئے مہمان خصوصی نے اس بات کا اعادہ کیا کہ پاک فضائیہ اور پی ایس ایف، باصلاحیت نوجوان کھلاڑیوں کی سرپرستی کرنے کےساتھ ساتھ ملک کو عالمی سکواش میں دوبارہ اپنا وقار بحال کرنے میں بھرپور کوششیں کرتے رہیں گے۔ فائنل دونوں پاکستانی کھلاڑیوں ناصر اقبال اور نور زمان کے درمیان کھیلا گیا جو ناصر اقبال نے جیت لیا ۔