حب: چھالیہ سے بھرا کنٹینرروکنے پرسمگلرز کی فائرنگ ، کسٹم اہلکار زخمی

لسبیلہ( این این آئی) حب مغربی بائی پاس کسٹم کا غیر ملکی چھالیہ سے بھرے کنٹینر پر چھاپہ سمگلرز کی فائرنگ سے کسٹم اہلکار زخمی ہو گیا ،فائرنگ کے تبادلے کے بعد دو افراد کو گرفتار کر کے دو کاریں اور غیر ملکی چھالیہ سمگل کرنے کی کوشش ناکام بنادیا گیا زخمی کسٹم اہلکار کراچی ہسپتال منتقل کردیئےگئے دونوں افراد کو صدر پولیس نے تحویل میں لے لیا ۔ذرائع نے بتایا کہ حب صدر تھانہ پولیس کیآنکھ اور ناک کے نیچے صدر تھانہ کے قریب ہی غیر ملکی سمگل شدہ اشیاء کے ذخیرہ کرنے کے گودام سے غیر ملکی چھالیہ اور دیگر ممنوعہ اشیاءسے ایک کنٹینر لوڈ کر کے کراچی سمگل کرنے کی کوشش کی جارہی تھی کہ خفیہ اطلاع ملنے پر گڈانی کسٹم کھرکھیڑہ چیک پوسٹ کے موبائل یونٹ اہلکاروں نے تعاقب کے بعد حب مغربی بائی پاس پر قائم پولیس چیک پوسٹ سے چند فرلانگ کے فاصلے پر کسٹم اہلکاروں نے کروڑوں روپے مالیت کی غیر ملکی چھالیہ اور دیگر نان کسٹم ڈیوٹی پیڈ اشیاءسے بھرے کنٹینر کو روک کر اپنی تحویل میں لینے کی جیسے ہی کوشش کی تو کنٹینر کے تعاقب میںآنے والے ڈالے میں سوار افراد نے کسٹم موبائل گاڑی پر فائرنگ کردی ۔