لاہور،میاں چنوں (سپورٹس رپورٹر)میاں چنوں میں قومی ایتھلیٹ ارشد ندیم کے گھر جشن کا سماں رہا، ان کے گھر میں جیولن تھرو کا فائنل مقابلہ لائیو دکھانے کیلئے بڑی اسکرین نصب کی گئی۔بڑی اسکرین پر ارشد ندیم کے دوست احباب فائنل دیکھنے کیلئے جمع ہوئے، اس موقع پر ارشد ندیم کی والدہ بیٹے کی کامیابی کے لیے دعاگو رہیں۔ارشد کی والدہ نے کہا کہ میں اللہ تعالی کی شکر گزار ہوں، دعائیں کرنے پر وہ پورے پاکستان کی شکر گزار ہیں، بیٹا آئندہ بھی ملک کا نام روشن کرے گا۔اس موقع پر ارشد ندیم کے بڑے بھائی نے کہا کہ ارشد کی کامیابی پر خوشی لفظوں میں بیان نہیں ہو سکتی، انجری کے باوجود ارشد کی کارکردگی بہت زبردست رہی، کامیابی پر رب کے شکر گزار ہیں۔ارشد ندیم کے چھوٹے بھائی نے کہا کہ ارشد بھائی نے بہت اچھی فائٹ کی، اگلے مقابلوں میں ان شا اللہ میرا بھائی پہلے نمبر پر آئے گا، انجری کے باعث ان کو ٹریننگ کے لیے وقت بہت کم ملا۔دوسری جانب لاہور میں بھی ورلڈ ایتھلیٹکس چیمپئن شپ کا فائنل لبرٹی چوک میں بڑی اسکرین پر دکھایا گیا۔