لاہور (کلچرل رپورٹر) کواپرا آرٹ گیلری نے ملک کے نامور فن کاروں کی پینٹنگز کی نمائش کا اہتمام کیا ہے جس کی افتتاحی تقریب گذشتہ ر وز منعقد ہوئی۔ ڈی سی او لاہور نور الامین مینگل تقریب کے مہمان خصوصی تھے۔ انہوں نے نمائش میں رکھے گئے فن پارے دیکھے۔ انہوں نے کہا کہ فن کاروں نے بہت خوبصورت کام کیا ہے خصوصاً اس نمائش میں پنجاب کے علاوہ دوسرے صوبوں سے فن کاروں کی شرکت اچھی بات ہے۔ انہوں نے کواپرا آرٹ گیلری کی انتظامیہ سے کہا ہے کہ لاہور کے موضوع پر ایک پینٹنگز مقابلے کا اہتمام کیا جائے جسے حکومت پنجاب سپانسر کرے گی اور اس نمائش کے شرکاءمیں پہلی، دوسری اور تیسری پوزیشن حاصل کرنے والوں کو نقد انعامات دئیے جائیں گے۔ مقابلے پر مشتمل نمائش کا انعقاد 15 فروری تک کرا لیا جائے۔ نمائش میں جن فنکاروں کے فن پارے رکھے گئے ہیں ان میں امجد نعیم، حسین چانڈیو، اقبال احمد کھوکھر، جام دیپار، منور محی الدین اور منظور سولنگی ہیں۔ نمائش میں 53 فن پارے رکھے گئے ہیں۔