نیشنل ہاکی چیمپئن شپ: پی اے ایف‘ سوئی سدرن‘ آرمی اور پی ٹی وی نے میچ جیت لئے

کراچی (سپورٹس رپورٹر) 62 ویں نیشنل ہاکی چمپئن شپ میں پاکستان ایئر فورس،سوئی سدرن گیس ،پاکستان آرمی اور پی ٹی وی نے اپنے میچز جیت لیے ،ہاکی کلب آف پاکستان پر جاری ایونٹ میں بلوچستان ،پنجاب پی کے اور اسلام آباد کی ٹیموں کو شکست کا سامنا کرنا پڑا ،مشتا ق،ایم عمران اور کاشف علی نے ہیٹ ٹرک اسکور کیں ۔ایونٹ کے چوتھے روز پہلے میچ میں پاکستان ایئر فورس نے بلوچستان کو5-1سے مات دی ۔فاتح ٹیم کی جانب سے مشتاق نے تین گول اسکور کر کے ہیٹ ٹرک بنائی جبکہ مدثر اور فہد اللہ نے ایک ایک گول کیا ،بلوچستان کا واحد گول ایاز لودھی نے کیا ۔دوسرے میچ میں سوئی سدرن گیس نے پنجاب کو 3-0سے شکست دے کر اہم کامیابی حاصل کی ،اس کی جانب سے عباس حیدر نے دو جبکہ رضوان علی نے ایک گول اسکور کیا ۔تیسرے میچ میں پاکستان آرمی نے خیبر پی کے کو 11-0کے اسکور سے نشان عبرت بنا ڈالا۔فاتح ٹیم کی جانب سے ایم عمران اور کاشف علی نے تین تین گول اسکور کرکے ہیٹ ٹرکس بنائیں جبکہ حماد ظفر نے دو ،عباس ،عبدالجبار اور حبیب الرحمان نے ایک ایک گول کیا ۔آخری میچ میں پی ٹی وی اور اسلام آباد کی ٹیموں کے درمیان سخت مقابلہ دیکھنے میں آیا جس میں پی ٹی وی نے 1-0سے کامیابی سمیٹ لی ۔میچ کا فیصلہ کن گول ایم وقاص نے 27ویں منٹ میں اسکور کیا ۔چیمپئن شپ میں آج بھی مزید تین میچز کھیلے جائیں گے ۔نیشنل بینک کا مقابلہ بلوچستان سے ہوگا جبکہ پاکستان آرمی پنجاب کے اور واپڈا اسلام آباد کے مد مقابل ہو گی ۔