کوہاٹ (نامہ نگار) کوہاٹ کچئی کے علاقہ طورہ وڑی میں سکیورٹی فورسز نے بھاری ہتھیاروں کا بڑا ذخیرہ برآمد کرلیا ہے۔ حساس اداروں کی اطلاع پر کارروائی کرتے ہوئے امام بارگاہ سے پیوست تہہ خانے پر اچانک چھاپہ مارا جہاں سے بھاری ہتھیاروں اور گولہ بارود برآمد کئے گئے۔ عسکری ذرائع کے مطابق سکیورٹی فورسز نے حساس اداروں کی اطلاع پر گزشتہ شام کارروائی کرتے ہوئے کوہاٹ کے نواحی علاقہ کچئی کے موضع طورہ وڑی میں امام بارگاہ سے پیوست ایک تہہ خانے پر اچانک چھاپہ مارا جہاں سے ایک انٹی ائیر کرافٹ گن،آر آر 75ہیوی گن، 85ایم ایم مارٹر گن، ایس ایم جی گن اور بھاری مقدار میں گولہ بارود برآمد کرلیا ہے۔ سکیورٹی فورسز نے کارروائی کے دوران پکڑا گیا اسلحہ قبضے میں لیکر ہیڈ کورٹر منتقل کر دیا ہے۔ قانون نافذ کرنے والے اداروں نے بڑی تعداد میں خطرناک ہتھیاروں کا ذخیرہ برآمد ہونے کے حوالے سے تفتیش شروع کردی ہے تاہم فوری طور پر اس بات کا تعین نہیں ہوسکا کہ اتنی بڑی تعداد میں اسلحہ و گولہ بارود کس مقصد کیلئے رکھا گیا تھا۔