اقوام متحدہ نے اس سال مقبوضہ مغربی کنارے سے آٹھ سو سے زائد فلسطینیوں کو بے گھر کرنے اور چھ سو سے زائد فلسطینیوں کے گھر مسمار کرنے پر شدید تنقید کی ہے۔
اسرائیلی کے مسلسل تسلط اور زمین پر قبضے سے متعلق جارحیت پر مبنی پالیسیوں کے بارے میں انسانی امور کے اقوام متحدہ کے رابطہ دفتر نے اس حوالے سے ایک رپورٹ جاری کی ہے۔رپورٹ میں مزید کہا گیا کہ اسرائیلی فوج نے اس سال مغربی کنارے میں متعدد واقعات میں کم از کم تین بچوں سمیت چودہ فلسطینیوں کو زخمی کیا اور آٹھ سو ستانوے فلسطینیوں کو بے گھر کیا۔اقوام متحدہ نے کہا کہ اسرائیل نے مقبوضہ مغربی کنارے میں یہودیوں کیلئے بائیس ہزار سے زائد نئے گھروں کی تعمیر کیلئے اپنے منصوبوں کو آگے بڑھایا ہے۔رپورٹ میں کہا گیا ہے کہ غزہ کی پٹی پر اسرائیل کے محاصرے کے باعث ماہانہ تقریباً دس کروڑ ڈالر کا معاشی نقصان ہورہا ہے۔