چیئرمین سینیٹ کی دعوت، قائمقام چیئرمین جبوتی نیشنل پارلیمنٹ کے صدر کی قیادت میں وفد پا کستان آئے گا

اسلام آباد(نیوزرپورٹر)چیئرمین سینیٹ محمد صادق سنجرانی کی دعوت پر افریقی یونین کے قائم مقام چیئرمین اور جبوتی نیشنل  پارلیمنٹ کے صدر محمد علی حاومید اپنے بارہ رکنی وفد کے ہمراہ  پاکستان پہنچ رہے ہیں۔وفد میںا رکان پارلیمنٹ کے علاوہ جبوتی کے نیول چیف بھی شامل ہونگے۔  وفد اہم ملاقاتوں کے علاوہ پاکستان کے مختلف علاقوں کا دورہ بھی کرے گا ۔ وفدکی چیئرمین سینیٹ، صدر پاکستان، وزیراعظم پاکستان، وزیر خارجہ، اسپیکر قومی اسمبلی اسد قیصر اور آرمی چیف، آزاد جموں کشمیر کے صدراور نیوی کے چیف سے اہم  ملاقاتیں شیڈول کا حصہ ہیں ۔چیئرمین سینیٹ نے کہا کہ پاکستان اور افریقی ممالک کے پارلیمان کے مابین تعلقات کو مستحکم بنانے کے لئے یہ دورہ انتہائی اہمیت کا حامل ہے اور پاکستان افریقی ممالک کے ساتھ پارلیمانی تعلقات کو انتہائی اہمیت دیتا ہے۔انہوں نے کہا کہ پارلیمانی روابط کے ذریعے تجارتی تعلقات مربوط بنانے میں مدد ملے گی۔