ہنگو (نوائے وقت رپورٹ) ہنگو کے علاقہ گلشن کالونی میں ایک گھر میں گیس بھر جانے سے 3 بچوں سمیت 6 افراد جاں بحق ہوگئے۔ رات کو ہیٹر لگا رہنے کے باعث کمرے میں گیس بھر گئی۔ دم گھٹنے سے پورا خاندان موت کے منہ میں چلا گیا۔ ریسکیو 1122 کے مطابق ہنگو کے علاقہ گلشن کالونی میں نادر خان نامی شخص کے گھر میں گیس بھرنے کی وجہ سے نادر، ان کی بیوی، بیٹی اور 3 بچے جاں بحق ہو گئے۔ اطلاع ملتے ہی ریسکیو 1122 نے موقع پر پہنچ کر تمام افراد کو ایمرجنسی طبی امداد فراہم کی لیکن تمام افراد موقع پر ہی دم توڑ گئے تھے۔ جاں بحق ہونے والے افراد کی نعشوں کو ڈسٹرکٹ ہیڈ کوارٹر ہسپتال ہنگو منتقل کردیا گیا۔ ایک ہی خاندان کے 6 افراد جاں بحق ہونے کے باعث علاقے میں کہرام مچ گیا۔
6 جاں بحق