دبئی(آئی این پی) انٹرنیشنل کرکٹ کونسل (آئی سی سی)نے رواں سال کے بہترین ٹیسٹ کرکٹرز کیلئے نامزدگیاں کردیں۔ٹیسٹ پلیئرز آف دی ایئر کے لیے چار کھلاڑیوں کو نامزد کیا گیا ہے جس میں بھارتی اسپنر روی چندر ایشون بھی شامل ہیں۔روی چندر ایشون کو اس سال 8 میچز میں 52 وکٹیں لینے اور  سنچری کے ساتھ 337 رنز بنانے پر نامزد کیا گیا ہے۔اس کے علاوہ انگلینڈ کے کپتان جو روٹ بھی ٹیسٹ پلیئر آف دی ایئر کی فہرست میں شامل ہیں جنہوں نے 15 میچز میں 1708رنز اسکور کیے، ان کی اننگز میں 6سنچریاں شامل ہیں۔اس فہرست میں نیوزی لینڈ کے کائیل جیمیسن کو بھی نامزد کیا گیا ہے جنہوں نے 5 میچز میں 27وکٹیں حاصل کیں اور 105رنز بھی بنائے۔آئی سی سی کی فہرست میں چوتھا اور آخری کھلاڑی سری لنکا کے بیٹر دیموتھ کرونارتنے ہیں جنہوں نے 7میچز میں 902رنز بنائے اور 4سنچریاں اسکور کیں۔پلیئر آف دی ایئر کا انتخاب ووٹوں کے ذریعے ہوگا جس میں شائقینِِ کرکٹ سال کے بہترین کھلاڑی کا انتخاب کریں گے۔