ڈیلے بلائنڈ کا 6 ماہ قبل ایجیکس  سے معاہدہ ختم کرنے پر اتفاق

لاہور(اسپورٹس ڈیسک ) فٹبال کلب ” ایجیکس “ نے کہا ہے کہ نیدرلینڈ فٹبال ٹیم کے کھلاڑی ڈیلے بلائنڈ نے کلب کےساتھ معیاد ختم ہونے سے 6 ماہ قبل معاہدہ کے اختتام پر اتفاق کر لیا ہے۔ مانچسٹر یونائیٹڈ کے 32 سالہ سابق فٹبال سٹار نے قطر میں ہونے والے فیفا ورلڈ کپ کے کوارٹر فائنل تک ہالینڈ کی تمام میچز میں نمائندگی کی اور امریکہ کےخلاف ایک گول کیا، تاہم بلائنڈ نے اب باہمی رضامندی سے ایجیکس کو چھوڑنے پر اتفاق کیا ہے۔ایجیکس کے صدر ایڈون وین ڈیر سار نے کہا کہ گزشتہ چند دنوں کے دوران ہم نے ڈیلے کے ساتھ معاہدے سے متعلق بات چیت کے بعد معاہدہ ختم کرنے پر اتفاق کیا ، امید ہے کہ وہ اپنے کامیاب کیریئر کو ختم کرنے کیلئے ایک اور کلب کو تلاش کر سکے گا۔ ڈیلے کےساتھ مل کر ہم نے ایرینا میں ایک میچ کا فیصلہ کیا ہے جہاں وہ اپنے ساتھی کھلاڑیوں اور مداحوں کو الوداع کہہ سکیں گے۔