اسلام آباد ‘ لاڑکانہ (نمائندہ خصوصی+ بیورو رپورٹ) پاکستان پیپلز پارٹی پارلیمنٹرینز کے صدر آصف علی زرداری نے گڑھی خدا بخش پہنچ کر شہداء جمہوریت کے مزارات پر حاضری دی جہاں سابق صدر مملکت آصف علی زرداری نے شہید محترمہ بینظیر بھٹو کے مزار پر فاتحہ خوانی اور  ذوالفقار علی بھٹو کے مزار پر پھول چڑھائے۔ آصف زرداری نے شہید میر شاہنواز بھٹو اور شہید میر مرتضی بھٹو کے مزارات پر بھی حاضری دی۔ آصف زرداری نے شہداء جمہوریت کے مزار پر پاکستان میں جمہوریت کی بالادستی اور ملک کے معاشی استحکام کے لیے دعائیں کی۔ اس موقع پر سکیورٹی کے انتظامات انتہائی سخت کرتے ہوئے مزار کو عام لوگوں سے خالی کروایا گیا۔ آصفہ بھٹو زرداری اور صنم بھٹو کی بھی گڑھی خدا بخش آمد اور بینظیر بھٹو کی مزار پر حاضری دی۔ آصفہ بھٹو زرداری اور صنم بھٹو نے قائد عوام بھٹو اور مادرِ جمہوریت بیگم نصرت بھٹو کی مزاروں پر بھی حاضری دی۔ بی بی آصفہ بھٹو زرداری اور صنم بھٹو نے شہید میر مرتضیٰ بھٹو اور شہید شاہنواز بھٹو کی مزاروں پر بھی پھول چڑھائے۔ آصفہ بھٹو زرداری اور صنم بھٹو نے شہید محترمہ بینظیر بھٹو سمیت تمام شہداء کے ایصال ثواب کے لیے قرآن خوانی کی اور دعا کی۔