لاہور (سپورٹس رپورٹر) سوزوکی پولو ٹورنامنٹ کے ابتدائی میچ میں سونیری بینک نے پی اے ایف کو شکست دیدی۔ لاہور پولو کلب میں شروع ہونیوالے سوزوکی پولو ٹورنامنٹ کے افتتاحی میچ میں سونیری بینک نے شاندار کھیل پیش کرتے ہوئے پی اے ایف کو ساڑھے چار کے مقابلے میں دس گول سے شکست دی۔ سونیری بینک کی جانب سے حصام علی حیدر نے شاندار کھیل پیش کرتے ہوئے ہیٹ ٹرک کی بدولت سات گول سکور کئے جبکہ ثاقب خان خاکوانی نے تین گول کئے۔ پی اے ایف کی طرف سے میجر عمرمنہاس نے دو گول سکور کئے جبکہ پی اے ایف کو اڑھائی گول ہینڈی کیپ کی بدولت ملے۔ فاتح ٹیم سونیری بینک کی طرف سے دفاعی کھلاڑیوں ایس ایس پی وسیم سیال نے شاندار کھیل پیش کرتے ہوئے حریف ٹیم کیلئے گول کا حصول مشکل بنائے رکھا جبکہ فارورڈز کھلاڑیوں حصام علی حیدر اور ثاقب خان خاکوانی نے عمدہ پولو کھیل کر اپنی ٹیم کو آسان فتح دلائی۔