میرانشاہ (نوائے وقت+ آن لائن+ اے ایف پی) شمالی وزیرستان کے علاقے شوال میں ڈرون حملہ ہوا جس سے 4 غیرملکیوں سمیت 7 افراد ہلاک جبکہ 4 زخمی ہوگئے۔ ڈرون حملے میں ایک گھر اور گاڑی پر 2 میزائل فائر کئے گئے۔ تفصیلات کے مطابق امریکی ڈرون طیارے نے شوال کے علاقہ منڈی میں ایک گھر اور گاڑی پر 2 میزائل فائر کئے۔ میزائل لگنے سے گھر مکمل طور پر تباہ ہوگیا۔ ذرائع کے مطابق ہلاکتوں کی تعداد میں اضافہ ہوسکتا ہے۔ واقعہ کے بعد بھی ڈرون طیاروں کی پروازیں جاری رہیں جس سے علاقے کے لوگوں میں خوف و ہراس پھیل گیا۔ واضح رہے رواں سال شمالی وزیرستان میں امریکی جاسوس طیاروں کا یہ چوتھا حملہ ہے۔