لاہور(آئی این پی)لاہور قلندرز کے کپتان سہیل اختر نے شاہین شاہ آفریدی اور حارث روف کو بولنگ میں جارحانہ انداز برقرار رکھنے کا مشورہ دے دیا۔سہیل اخترنے کہا ہے کہ شاہین شاہ آفریدی اور حارث روف پاکستان کرکٹ کا اثاثہ ہیں، دونوں بہت سخت محنتی کرکٹرز ہیں، جتنی ان پر تنقید ہو وہ اتنی ہی محنت کر کے اپنی کارکردگی بہتر بناتے ہیں، انگلینڈ سے حالیہ سیریز میں دونوں نے تنقید کے باوجود  اچھی بولنگ اور فیلڈنگ کی، اس سے ان کی خود اعتمادی کا اندازہ لگایا جا سکتا ہے۔انھوں نے کہا کہ اگر کسی فاسٹ بولر میں جارحیت نہیں تو وہ فاسٹ بولر ہی نہیں، لاہور قلندرز کے کوچ عاقب جاوید اور میں بطور کپتان ہمیشہ شاہین اور حارث کو جارحیت کے ساتھ بولنگ کی ہدایت دیتے ہیں، اگر آپ تیز بولنگ کرنے کے بعد  بیٹسمین کی جانب مسکرا کر دیکھیں تو وہ ریلیکس ہو جائے گا، اس لیے فاسٹ بولرز کیلیے جارح مزاج ہونا ضروری ہے، رائٹ ہینڈر بیٹسمین نے کہا کہ محمد حفیظ عظیم کھلاڑی ہیں، فیلڈ اور باہر انھوں نے ہمیشہ مجھے سپورٹ کیا، ہم نے ان کے تجربے سے کافی کچھ سیکھا، میں خوش قسمت ہوں کہ کشمیر پریمیئرلیگ میں ان کی زیر قیادت ٹیم مظفرآباد ٹائیگرز کی نمائندگی کروں گا۔سہیل اختر نے کہا کہ ہماری ٹیم تجربہ کار اور بہت متوازن ہے، ہمیں باصلاحیت نوجوان کرکٹرز کا بھی ساتھ حاصل ہوگا، امید ہے کہ مقامی کراوڈ کے سامنے مظفرآباد ٹائیگرز کی ٹیم اچھا پرفارم کرے گی۔