لاہور(خصوصی نامہ نگار)نواسہ رسول جگر گوشہ بتول حضر ت امام حسینؓ اوردیگر شہدائے کربلاؓ کی لازوال قربانیوں کو خراج عقیدت پیش کرنے کیلئے پاکستانی ٹیلی ویژن لاہور سینٹر کی جانب سے پی ٹی وی کی خصوصی ٹرانسمیشن جاری ہے۔جس کی نگرانی ایگزیکٹو پرڈیوسر جی ایم لاہور سنٹر سیف الدین خاں، پروگرام منیجر قیصر شریف اور افتخار ورک کررہے ہیں۔ لاہور سنٹر کی جانب سے پیش کئے جانے والے پروگرامز میں مرثیہ نو تصانیف،نوحے، مسلم تہذیب اور کربلا، مجلس شب عاشورکے پروگرام شامل ہیں۔اس کے علاوہ سوزو سلام 6سے 10محرم تک جاری ہے جبکہ 9اور 10محرم کے یوم عاشور کے جلوسوں کی بھی خصوصی کوریج کی جائے گی۔جی ایم لاہور سنٹر سیف الدین خاں کا کہنا تھا کہ محرم الحرام ہمیں سید الشہداءحضرت امام حسین علیہ السلام کی راہ حق میں لازوال قربانی کی یاد دلاتا ہے۔ حضرت اما م حسین علیہ السلام اور ان کے ساتھیوں کی میدان کربلا میں دی گئی لازوال قربانیاں ہمارے لئے مشعل راہ ہیں۔ واقعہ کربلا سے سبق حاصل ہوتا ہے کہ باطل مٹ جائے گا اور حق باقی رہے گا۔شہدائے کربلا کی عظیم قربانیوں نے دین اسلام کے آفاقی اصولوں صبر،برداشت اورقربانی کو قیامت تک کیلئے زندہ کردیا ہے۔