گھوٹکی (این این آئی) گھوٹکی کچے کے تھانہ آندل سندرانی کے حفاظتی بند پر قائم پولیس چوکی پر ڈاکوئوں نے رات گئے جدید اسلحے سے حملہ کر دیا۔ فائرنگ سے2  اہلکار شہید ہوگئے۔ پولیس کے مطابق ایک درجن سے زائد ڈاکوئوں نے حملہ کیا، شہید اہلکاروں میں ظہیر احمد تھہیم اور قادر بخش مہر شامل ہیں۔ ایس ایس پی گھوٹکی سمیر نور چنہ کے مطابق پولیس نے بھرپور جوابی کارروائی کی، جس میں ڈاکوئوں کے زخمی ہونے کی بھی اطلاعات ہیں۔ پولیس کی بھاری نفری کو طلب کر لیا گیا جبکہ زخمی ڈاکوئوں کا تعاقب جاری ہے۔ دوسری جانب شہید ہونے والے پولیس اہلکاروں قادر بخش مہر اور ظہیر احمد تھہیم کی نماز جنازہ پولیس لائن میں ادا کر دی گئی۔ ایس پی گھوٹکی سمیر نور چنہ سمیت شہریوں، سیاسی سماجی رہنمائوں نے بڑی تعداد میں شرکت کی۔ پولیس کے خصوصی دستے نے شہید اہلکاروں کو سلامی پیش کی اور ایس پی گھوٹکی نے پھولوں کی چادر چڑھائی۔ ایس پی گھوٹکی سمیر نور چنہ نے شہید اہلکاروں کے ورثاء سے ہمدردی اور تعزیت کا اظہار کرتے ہوئے ڈاکوئوں کے خاتمے تک پولیس چین سے نہیں بیٹھے گی۔ شہداء کی فیملی کی مکمل مدد کی جائے گی۔