لندن (سپورٹس ڈیسک) سرینا ولیمز‘اینڈی مرے ‘واورینکا‘جوان مارٹن ڈیل پوٹرو ‘مور‘سویتلانا کوزنٹسووا ومبلڈن اوپن ٹینس ٹورنا منٹ کے دوسرے رائونڈ میں پہنچ گئے ۔ویمنز سنگلز کی دفاعی چیمپئن امریکی سٹار سرینا ولیمز نے عالمی نمبر 148سوئٹزر لینڈ کی امرا سیڈیکووک کو چھ دو اور چھ چار سے شکست دی۔برطانوی سٹا ر اینڈی مرے نے وائلڈ کارڈ پر کھیلنے والے ہم وطن لیام براڈ ی کو چھ دو‘چھ تین اور چھ چار سے ہرایا۔ویمنز سنگلز میں وائلڈ کارڈ پر کھیلنے والی تارا مور نے علیسن وین کو شکست دے گرینڈ سلم کی پہلی فتح حاصل کی ۔انہوں نے حریف کھلاڑی کو چھ تین اور چھ دو سے ہرایا۔وہ دوسرے رائونڈ میں پہنچنے والی چوتھی انگلش کھلاڑی بن گئیں ۔سٹان واورینکا نے18سالہ امریکی کھلاڑی ٹیلر فرٹز کو سات چار‘چھ ایک ‘چھ سات‘چھ چار سے ہرایا۔ارجنٹائن کے ڈیل پوٹرو نے فرانس کے سٹیفن رابرٹ کو چھ ایک ‘سات پانچ اور چھ صفر سے زیر کیا۔آسٹریلیا کے نک کرجیئس نے راڈک سٹیپنک کو چھ چار‘چھ تین ‘چھ سات اور چھ ایک سے شکست دیدی۔