کراچی (نوائے وقت رپورٹ) کھارادر موسیٰ لین میں زرگراں ویلفیئر ایسوسی ایشن کا صدر نامعلوم ملزمان کی فائرنگ سے جاں بحق ہو گیا۔ فائرنگ کی زد میں آکر خاتون سمیت 2 افراد بھی زخمی ہو گئے۔ کھارادر موسیٰ لین میں موٹرسائیکل سوار ملزمان نے اندھاندھند فائرنگ کر دی جس کے نتیجے  میں ایک شخص موقع پر ہی جاں بحق ہو گیا جبکہ خاتون سمیت 2 افراد زخمی ہو گئے۔ مقتول کی نعش ضابطے کی کارروائی کیلئے سول ہسپتال لائی گئی جہاں اس کی شناخت 45 سالہ محمد عرفان کے نام سے کی گئی جوکہ زرگراں ویلفیئر ایسوسی ایشن کا صدر تھا جبکہ زخمی خاتون 40 سالہ نسیمہ اور 17 سالہ عبدالوہاب کو طبی امداد  فراہم کی جا رہی ہے۔ اس حوالے سے ایس ایس پی سٹی عارف عزیز نے بتایا کہ مقتول عرفان تاجر تھا اور اس کا کافی عرصے سے پلاٹ کا تنازع چل رہا تھا جبکہ اسے دھمکیاں بھی مل رہی تھیں۔ عارف عزیز نے مزید بتایا کہ شبہ ہے کہ فائرنگ کا واقعہ پلاٹ کے تنازع کا شاخسانہ ہوسکتا ہے۔ ذرائع کا کہنا ہے کہ واقعہ گینگ وار کے کارندے ملوث ہیں جوکہ لیاری سمیت اولڈ سٹی ایریا میں ایک بار پھر سے متحرک دکھائی دیتے ہیں۔