مصری شاہ: سکریپ گودام میں ہینڈ گرنیڈ پھٹنے سے مزدور جاں بحق

لاہور (نامہ نگار) مصری شاہ کے علاقے میں سکریپ گودام میں ہینڈ گرنیڈ پھٹنے سے ایک مزدور جاں بحق ہوگیا ہے جبکہ علاقے میں شدید خوف وہراس پھیل گیا ہے۔ تفصیلات کے مطابق مصری شاہ کے علا قے میں سکریپ گودام میں مزدور کام کر رہے تھے کہ ایک مزدر خلیل کے ہاتھ میں سکریپ سے نکلا  ہینڈ گرنیڈ زور دار دھماکے سے پھٹ گیا۔ اطلاع ملنے پر پولیس کی بھاری نفری موقع پر پہنچ گئی۔ پولیس نے فرانزک ٹیم کی مدد سے شواہد جمع کیے اور نعش قبضے میں لے کر پوسٹ مارٹم کے لئے مردہ خانے منتقل کر کے تحقیقات شروع کر دی ہیں۔ علاوہ ازیں سکریپ گودام میں ہینڈ گرنیڈ پھٹنے کی سی سی ٹی وی فوٹیج بھی سامنے آئی ہے۔ ایس پی سٹی کیپٹن (ر) قاضی علی نے بتایا کہ سی سی ٹی وی فوٹیج سے پتا چلا ہے کہ سکریپ کے گودام میں 4 مزدور کام کر رہے تھے۔ اس دوران 3 مزدور گودام سے باہر چلے جاتے ہیں۔ ایک مزدور خلیل کو سکریپ سے ہینڈ گرنیڈ ملتا ہے، مزدور ہینڈ گرنیڈ کو ہاتھ میں پکڑ کر اس کو کھولنے کی کوشش کرتا ہے۔ اس دوران ہینڈ گرنیڈ زور دار دھماکہ سے پھٹتا ہے۔ قانونی کارروائی بھی شروع کر دی گئی ہے۔