کراچی (کرائم رپورٹر) کراچی کے علاقے گلشن معمار میں گزشتہ روز نامعلوم شخص کی نعش سہرا گارڈن کے قریب جھاڑیوں سے ملی جسے گلا کاٹ کر قتل کیا گیا تھا۔ پولیس کے مطابق مقتول کی عمر تقریباً 22 سال تھی تاہم فوری طورپر اس کی شناخت نہیں ہوسکی ہے۔ دوسری طرف حساس اداروں اور پولیس نے نیو کراچی اور بلدیہ ٹاﺅن میں سرچ آپریشن کے دوران سیاسی جماعت کے کارکنوں سمیت 22 جرائم پیشہ افراد کو حراست میں لے کر اسلحہ، موٹرسائیکل، قماربازی کا سامان، نقدی سمیت دیگر سامان برآمد کر لیا۔ اسی طرح رینجرز اور پولیس نے مشترکہ کارروائی کرتے ہوئے شارٹ ٹرم کڈنیپنگ میں ملوث 3 ملزموں کو مقابلے کے بعد گرفتار کرلیا۔ ایس ایس پی ایس آئی یو فاروق اعوان نے کہا تھا کہ ملزموں توفیق جاگیرانی، عدنان عرفان اور کاشف کریم قبضے سے 3 ٹی ٹی پستول بھی برآمد ہوئے۔ ملزموں نے 12 مارچ کو ڈیفنس فیز6 خیابان شہباز سے سٹیل کے تاجر کے بیٹے 14 سالہ کاشان الرحمان کو کار ڈرائیو کرتے ہوئے اغوا کرلیا تھا اور اس کے والد سے 1 کروڑ روپے تاوان کا مطالبہ کیا تھا۔ بعدازاں ساڑھے 3 لاکھ روپے وصول کرنے کے بعد مغوی کو رہا کیا گےا۔ ادھر قانون نافذ کرنیوالے اداروں نے شاہ فیصل کالونی میں کارروائی کے دوران ٹارگٹ کلر کو گرفتار کرلیا۔ گرفتار ملزم بلال عرف بھیا کا تعلق سیاسی جماعت سے ہے اور گینگ وار سرغنہ عزیر بلوچ کا ساتھی رہ چکا ہے۔ ملزم ٹارگٹ کلنگ اور بھتہ خوری کی متعدد وارداتوں میں ملوث ہے۔ ادھر پولیس نے نیوکراچی میں کارروائی میں دو ملزم گرفتار کرلئے۔ ملزموں کو زخمی حالت میں پکڑا گیا۔ ملزم بھتہ خوری وارداتوں میں ملوث ہیں اور انکا تعلق لیاری گینگ وار سے ہے۔
کراچی/ نعش