لاہور+ سیالکوٹ (نیوز رپورٹر+ نمائندہ خصوصی) وزیر اعلیٰ پنجاب کی معاون خصوصی ڈاکٹر فردوس عاشق اعوان کا کہنا ہے کہ پی ڈی ایم مردہ گھوڑے کی شکل اختیار کرچکا ہے۔ اس گھوڑے پر جعلی راجکماری نے کمان سنبھال لی ہے۔ پی ڈی ایم نے جو ٹوٹ بٹوٹ کی کھیر پکائی تھی اس پر لڑائی ہوگئی ہے اس میں ایک کی دم اور ایک کی چونچ گم ہوگئی ہے۔ مریم آر، بلاول پار اور مولانا ہوگئے خوار، عمران خان دن بدن مضبوط ہوتا چلا جارہا ہے۔ مریم کی ضد اور انتہا پسندی کی سیاست میں نہ چچا اور کزن ان کے ساتھ ہیں۔ ہم سب کو ذمہ داری کو مظاہرہ کرنا ہے۔ عوام چاہتے ہیں ظل سبحانی پاکستان آکر عدالتوں کا سامنا کریں۔ لاہور میں میڈیا سے گفتگو میں ان کا کہنا تھا کہ عوام کو تکلیف سے نکالنے کیلئے 2لاکھ ٹن چینی درآمد کروانے جارہے ہیں۔ حکومت پنجاب نے 60روپے فی کلو چینی کا نرخ مقرر کیا ہے۔ 313سہولت بازار قائم کئے جارہے ہیں۔ سہولت بازاروں میں اشیاء  ضروریہ کی ڈیمانڈ پر نظر رکھی جائے گی۔  دریں اثنا سیالکوٹ میں  میڈیا  سے گفتگو کرتے ہوئے انہوں نے کہا کہ این سی او سی اجلاس میں فیصلہ کیا گیا ہے کہ صوبہ میں ماسک پہننا لازمی قرار دیا گیا ہے‘ ماسک نہ پہننے پر  جرمانے اور 6 ماہ قید ہو سکتی ہے۔ رمضان المبارک اور عید تک شادیوں و دیگر اجتماعات پر فی الفور پابندی لگانے کے لئے سفارش کی گئی ہے‘ کرونا کے بڑھتے ہوئے خدشات کے پیش نظر  مارکیٹیں اور شاپنگ مالز اور دیگر رش والی جگہوں پر  حکومت کی جانب سے جاری کردہ ایس او پیز پر عمل درآمد کروانے کے لئے کڑے اقدامات کرنے کی ہدایات دی گئی ہیں۔