کپتان نے مخالفین کو کلین بولڈ  کردیا: عثمان بزدار

لاہور (نیوز رپورٹر)  مستعفی وزیراعلیٰ عثمان بزدار نے پنجاب بھر سے اسلام آباد جلسے میں شرکت کرنے والے پی ٹی آئی عہدیدارو ں اور کارکنوں کو خراج تحسین پیش کیا ہے۔ انہوں نے کہا کہ لاکھوں کارکنوں کا دل کی اتھاہ گہرائیوں سے شکریہ ادا کرتا ہوں۔ وزیراعظم عمران خان نے اپوزیشن کے خلاف عوامی ریفرنڈم جیت لیا ہے اور جلسے میں موجود لاکھوں افراد نے کپتان کے حق میں فیصلہ دے دیا۔ کپتان نے اپنی سیاسی قوت ثابت کردی اور ثابت ہوگیا کہ وزیراعظم عمران خان ہی واحد حقیقی قومی لیڈر ہیں۔ وزیراعظم عمران خان کی پر اثر تقریر نے قوم کے دل جیت لئے ہیں اور وزیراعظم عمران خان کا فکر انگیز خطاب قوم کیلئے مشعل راہ ہے۔ کپتان نے مخالفین کو کلین بولڈ کردیا ہے۔ انہوں نے کہا کہ تاریخ ساز جلسہ مخالفین کیلئے نوشتہ دیوارہے۔ اپوزیشن مل کر بھی عوامی مقبولیت میں کپتان کا مقابلہ نہیں کرسکتی۔ عثمان بزدار نے کہا ہے کہ کسانوں سے 2200 روپے فی من کے حساب سے گندم خریدی جائے گی۔ پنجاب کابینہ نے 35لاکھ میٹرک ٹن گندم خرید نے کا ہدف مقرر کیا ہے اور ضرورت پڑنے پر گندم خریداری کا ہدف مزید بڑھایا جاسکے گا۔ عثمان بزدار نے دیر میں مسافر وین کھائی میں گرنے سے قیمتی انسانی جانوں کے ضیاع پر دکھ اور افسوس کا اظہار کیا ہے۔