لاہور (سپیشل رپورٹر)پی آئی ایس جے ای ایس پاکستان سے منسلک بلا شبہ ایک ایسا سکول ہے جس پر ہم بجا طور پرفخر کر سکتے ہیں۔ سفیر پاکستان امیر خرم راٹھورنے پاکستان انٹرنیشنل سکول جدہ، انگلش سیکشن کا دورہ کیا۔اس موقع پر سکول کے پرنسپل عدنان ناصر نے ان کا انتہائی گرمجوشی سے خیر مقدم کرتے ہوئے کہا کہ میں آپ کو اپنی اور تمام فیکلٹی کی جانب سے خوش آمدید کہتا ہوں۔ اس موقع پر پرنسپل نے انھیں   سکول کے بنیادی تعلیمی ڈھانچے اورا علیٰ تعلیم کے فروغ میں سکول کے کردار کے بارے میں تفصیلاً بریفنگ دی۔ سفیر پاکستان امیر خرم راٹھورنے سکول کے موجودہ نظام ، اس کے بنیادی ڈھانچے ،اعلیٰ تعلیمی معیار اورپرنسپل عدنان ناصر کی پالیسیوں اور کاوشوں کو سراہتے ہوئے کہا کہ یہ نہ صرف اعلی اور معیاری تعلیم، تعلیمی نتائج کو مزید بہتر بنائیں گی بلکہ طلبہ کی مجموعی نشو نما کو بھی یقینی بنائیں گی۔ انھوں نے کہا کہ مجھے خوشی ہے کہ پاکستان انٹرنیشنل سکول، جدہ، انگلش سیکشن کا شمار مشرق وسطیٰ میں موجود پاکستانی کمیونٹی کے ان بہترین سکولوں میں ہوتا ہے جس پر ہم بجا طور پر فخر کر سکتے ہیں۔اس کیلئے سکول انتظامیہ ، اساتذہ اور بالخصوص پرنسپل عدنان ناصر مبارک باد کے مستحق ہیں۔