دیر (آئی این پی)دیر بالا  میں گاڑی کھائی میں گرنے سے خواتین اور بچوں سمیت 10 افراد جاں بحق  ہوگئے ہیں۔دیر بالا کے علاقے پاتراک چالال کے قریب مسافر وین تیز رفتاری کے باعث بے قابو ہوکر گہری کھائی میں جاگری۔حادثے میں متعدد افراد جاں بحق اور زخمی ہوگئے۔واقعے کی اطلاع ملتے ہی مقامی افراد اور ریسکیو رضاکاروں نے امدادی کارروائیاں شروع کریں۔نعشوں اور زخمیوں کو قریبی سرکاری ہسپتال منتقل کردیا گیا، جہاں عملے نے 10 افراد کے جاں بحق ہونے کی تصدیق کردی۔ہسپتال انتظامیہ کا کہنا ہے کہ واقعے میں زخمی ہونے والے 8 افراد کو طبی امداد دی جارہی ہے۔زخمیوں میں سے بعض کی حالت تشویشناک بتائی جارہی ہے، جس کی وجہ سے اموات میں اضافے کا خدشہ ہے۔پولیس کا کہنا ہے کہ حادثے کا شکار ہونے والی وین مردان سے کلکوٹ جارہی تھی۔ جاں بحق افراد اور زخمیوں میں خواتین اور بچے بھی شامل ہیں۔جاں بحق افراد کی لاشیں لواحقین کے سپرد کرنے کے لیے ضابطے کی کارروائی مکمل کرلی گئی ہے۔