بھارتی ریاست راجستھان میں ہندو توا غنڈوں نے مسجد شہید کر دی 

جے پور(اے پی پی)بھارتی ریاست راجستھان کے علاقے چتور گڑھ میں ہندو توا غنڈوں نے ایک مسجد کو نذر آتش کر دیا اور تقریبا 12 افراد کو  تشدد کر کے زخمی کر دیا۔کشمیرمیڈیاسروس کے مطابق ہندو توا غنڈے ڈھول پیٹتے ہوئے مسجد کے پاس پہنچنے جب اس میں نماز ادا کی جا رہی تھی۔ کچھ مسلمانوں نے ڈھول کی آواز پر اعتراض کیا جس پر ہندو تواغنڈے مشتعل ہوئے اور مسجد کو آگ لگا دی ۔ انہوں نے مسلمانوں کو بہیمانہ تشدد کا نشانہ بنایا جس کے نتیجے میں 12مسلمان زخمی ہو گئے ۔ ہندو فرقہ پرستوں نے واقعے کی ایک ویڈیو بھی بنائی اور اسے سوشل میڈیا پر وائرل کردیا۔ ویڈیو میں ہندو غنڈوں کومسجد کو نذرآتش کرتے اور مسلمانوں کو تشدد کا نشانہ بناتے ہوئے واضح طور پر دیکھا جاسکتا ہے۔ واقعے کے بعد علاقے میں حالات کشیدہ ہو گئے ہیں۔