اورنج ٹرین سٹیشن سے خاتون کی خود کشی ‘ سکیورٹی نہ تھی 

لاہور(نامہ نگار) چوک یتیم خانہ میٹرواورنج ٹرین سٹیشن سے ہفتے کے روز خاتون کی نیچے کود کر خود کشی کرنے کی سی سی ٹی وی فوٹیج سامنے آئی ہے ۔سی سی ٹی وی ویڈیو میں دیکھا جاسکتا ہے کہ خود کشی کرنے والی خاتون اورنج ٹرین سے اترتی ہے۔خاتون ٹرین سے اتر کر کچھ لمحے سڑھیوں کے قریب کھڑی رہتی ہے۔ مسافروں کے سٹیشن سے باہر نکلتے ہی خاتون سٹیشن کی گرل کے قریب پہنچ جاتی ہے۔خاتون گرل سے چند لمحے سٹیشن سے نیچے دیکھتی ہے اوراچانک خاتون جمپ لگا کر گرل پر بیٹھتی ہے اور پھر نیچے کود جاتی ہے۔میٹروسٹیشن کے اندر کسی بھی جگہ پر سکیورٹی اہلکار نظر نہیں آتے ہیں۔سکیورٹی اہلکاروں کی غیر موجودگی میں خاتون بآسانی سٹیشن سے کود جاتی ہے۔ہلاک ہونے والی خاتون کی تاحال شناخت نہیں ہو سکی ہے۔پولیس کے مطابق خاتون کے ورثاءکی تلاش جاری ہے۔