لاہور(نامہ نگار)نشتر کالونی پولیس نے گن پوائنٹ پر شہری سے قربانی کا بکرا چھیننے والے ایک ڈاکو کو گرفتار کر لیا جبکہ اس کا ساتھی فرار ہونے میں کامیاب ہو گیا ہے۔ترجمان ڈولفن کے مطابق ڈولفن ٹیم کو بکرا چھیننے کی اطلاع 15پر موصول ہوئی تھی۔ڈاکو بکرا چھین کر موٹر سائیکل پرفرار ہورہے تھے۔ٹیم نے تعاقب کرتے ہوئے اٹاری بازار میں ڈاکو گرفتار کر کے بکرا برآمد کر لیا جبکہ ڈاکو کا دوسرا ساتھی بکرا پھینک کر تنگ گلیوں کا فائدہ اٹھاتے ہوئے فرار ہوگیا۔ڈولفن ٹیم نے بکرا اصل مالک کے حوالے کردیا۔ ڈاکوؤں کے قبضہ سے برآمد ہونے والی موٹر سائیکل ڈکیتی کے مقدمہ میں نشتر پولیس کو مطلوب تھی۔ گرفتار ڈاکو تھانہ نشتر کے حوالے کردیا گیا ہے جبکہ فرار ہونے والے ڈاکو کی تلاش جاری ہے۔