لاہور+ پشاور(نامہ نگار+آئی این پی)جو ہر ٹاؤن میں موٹرسائیکل اور ٹرالر کے درمیان تصادم کے نتیجے میں 2 نوجوان جاں بحق جبکہ ایک شدید زخمی ہو گیا ہے۔ جوہر ٹاؤن میں کینال روڈ پر ڈاکٹر ہسپتال کے قریب ایک موٹر سائیکل پر سوار 3 نوجوان تیز رفتاری کے باعث اپنے سے آگے جانے والے ٹرالر سے ٹکرا گئے۔نعشوں اور زخمی کو ہسپتال منتقل کر دیا گیا۔جاں بحق ہونے والے نوجوانوں کی شناخت سلمان اور عمیر کے ناموں سے ہوئی ہے۔ حادثہ تیز رفتاری کے باعث پیش آیا۔پشاور میں 2 گاڑیوں کے درمیان تصادم کے نتیجے میں 4 افراد جاں بحق جبکہ 2 شدید زخمی ہو گئے ہیں۔ تفصیلات کے مطابق ٹریفک کا افسوسناک حادثہ پشاور کے علاقے رنگ روڈ پر پیش آیا جہاں 2 گاڑیاں تیز رفتاری کے باعث آپس میں ٹکرا گئیں، حادثے کے نتیجے میں 4 افراد موقع پر دم توڑ گئے جبکہ 2 شدید زخمی ہو گئے ہیں۔ حادثے کی اطلاع ملنے کے بعد ریسکیو ٹیم موقع پر پہنچ گئی، نعشوں اور زخمیوں کو ہسپتال منتقل کر دیا جہاں زخمی ہونے والوں کو طبی امداد دی جا رہی ہے، پولیس نے جائے وقوعہ کا جائزہ لینے کے بعد تفتیش شروع کر دی ہے۔