کراچی (کرائم رپورٹر) کراچی کے مختلف علاقوںمیں فائرنگ کے واقعات میں ایک نوجوان ہلاک اور 2 افراد زخمی ہوگئے۔ تفصیلات کے مطابق لانڈھی نمبر ایک میں نور منزل کے قریب مسلح افراد کی فائرنگ سے ایک نوجوان20 سالہ شہزاد دلدارشاد الحق دم توڑ گیا جبکہ 18 سالہ مسعود شاہ زخمی ہوگیا جبکہ ٹاور پر مسلح افراد کی فائرنگ سے کارسوار نوجوان رحیم زخمی ہوگیا۔ پولیس کے مطابق دونوں واقعات ڈکیتی کے دوران مزاحمت کے نتیجے میں پیش آئے علاوہ ازیں شہر کے مختلف علاقوںسے کالعدم تنظیم کے 3 کارندوں سمیت8 دہشت گردوں کوگرفتار کرلیا گیا جن کے قبضے سے بھاری اسلحہ اور گولہ بارود برآمد کیا گیا ہے۔ سی ٹی ڈی پولیس کے مطابق تینوں گرفتاردہشت گردوں جہانزیب‘ حبیب اللہ اور نوشیر کا تعلق کالعدم تحریک طالبان پاکستان کے عابد مچھڑ اور زبیر گروپ سے ہے وہ اور ان کے دونوں مفرور ساتھی عینی اور عثمان بھتہ خوری اور اغوا برائے تاوان کی وارداتوں میں ملوث ہیں اور سہولت کار کے طورپر کالعدم تحریک طالبان کی فنڈنگ کرتے تھے۔ ادھر حساس اداروں نے کراچی کے علاقے منگھوپیر‘اورنگی اور کورنگی میں کارروائی کرتے ہوئے کالعدم تنظیم سے تعلق رکھنے والے پانچ دہشت گردوں کوگرفتار کرلیا۔ جو سیکیورٹی فورسز اور حساس تنصیبات پر حملوں میں مطلوب تھے۔ دہشت گردوں سے اسلحہاور گولہ بارود برآمد کر لیا گیا ہے۔
نوجوان ہلاک