قائداعظم ٹرافی ٹورنامنٹ کے سپر8 مرحلہ کا نیا شیڈول جاری

لاہور(سپورٹس رپورٹر+نمائندہ سپورٹس )قائد اعظم ٹرافی ٹورنامنٹ کے سپر 8 مرحلے کا نیا شیڈول جاری کردیا گیا ہے جس کا آغاز 3 دسمبر سے ہوگا اور فائنل 21 دسمبر کو کھیلا جائے گا۔قومی ٹی ٹوئنٹی 27 نومبر کو مکمل ہونے کے بعد قائد اعظم ٹرافی ٹورنامنٹ کا سپر8 مرحلہ 29 نومبر کو شروع ہونا تھا لیکن اسلام آباد دھرنے کی وجہ سے قومی ٹی ٹوئنٹی ایونٹ کے سیمی فائنلز 29 نومبر اور فائنل 30کو شیڈول کیا گیا ہے۔ اس لئے قائد اعظم ٹرافی کا سپر ایٹ مرحلہ اب 3دسمبر کو شروع ہو گا۔پہلے مرحلے میں 3 دسمبر سے 6 دسمبر تک 4 میچز کھیلے جائیں گے، سوئی ناردن اور ایچ بی ایل سے نیشنل بینک سٹیڈیم کراچی، لاہور بلیوز اور لاہور وائٹس یو بی ایل گراونڈ نمبر 1 کراچی میں مد مقابل ہوں گی، یو بی ایل اور سوئی سدرن گیس کا مقابلہ نیاز سٹیڈیم حیدر آباد جبکہ کے آر ایل اور واپڈا کا میچ اسٹیٹ بینک گراونڈ کراچی میں شیڈول ہے۔ دوسرے مرحلے کے میچز 9 دسمبر جبکہ تیسرے مرحلے میں 15 دسمبر سے میچز کھیلے جائیں گے، فائنل 21سے25 دسمبر تک شیڈول کیا گیا ہے۔