ماڈل ٹاؤن فٹبال اکیڈمی آج دبئی روانہ ہو گی

لاہور(سپورٹس رپورٹر+نمائندہ سپورٹس) دبئی میں منعقد ہونے والے انٹرنیشنل ٹورنامنٹ میں شرکت کے لیے ماڈل ٹاون فٹبال اکیڈمی ٹیم آج علی الصبح دبئی روانہ ہوگی۔ ماڈل ٹاون فٹبال کلب کی قیادت حمزہ یاسر کرینگے جبکہ زین کو ٹیم کا نائب کپتان مقرر کیا گیا ہے۔ اس بات کا اعلان ماڈل ٹاون فٹبال اکیڈمی کے چیف ایگزیکٹو میاں رضوان علی نے پریس کانفرنس کرتے ہوئے کیا۔ اس موقع پر ٹیم کے کوچ محمد ریاض بھی موجود تھے۔ ان کا کہنا تھا کہ پہلا موقع ہے کہ ہماری کلب کے کھلاڑی کسی بین الاقوامی ٹورنامنٹ میں شرکت کرنے جا رہی ہے۔ انڈر 13 دبئی ونٹر ٹورنامنٹ میں 32 ٹیمیں حصہ لے رہی ہیں، امید ہے کہ کھلاڑیوں کو جس طرح کی تیاری کرائی گئی ہے ٹاپ فور میں جگہ بنانے میں کامیاب ہو جائیں گے۔سکواڈ میں میاں رضوان علی ہیڈ آف ڈیلیگیشن، محمد ریاض کوچ اور محمد ندیم ٹرینر شامل ہیں جبکہ کھلاڑیوں میں محمد فہد شبیر، حسن بن عاصم، عمر حبیب الہی، سلمان بن بلال، محمد فلک ندیم، مرتضٰی ندیم بٹ، عثمان اکبر، نعیم عباس، حمزہ یاسر، عشر گورسی، زید اور زین شامل ہیں۔ میاں رضوان نے شکوہ بھی کیا کہ جلد از جلد حکومت فیڈریشن کے معاملات کو حل کرائے۔