لاہور(سپورٹس رپورٹر+نمائندہ سپورٹس )قومی ٹی ٹونٹی ٹورنامنٹ کے ملتوی ہونے والے سیمی فائنلز آج جبکہ فائنل کل کو کھیلا جائے گا۔راولپنڈی میں جاری ایونٹ کا فائنل فور مرحلہ ہفتہ کو مکمل ہونے کے بعد چیمپئن ٹیم کا فیصلہ پیر کو ہونا تھا لیکن اسلام آباد میں دھرنے کے خلاف ایکشن کی وجہ سے حالات کشیدہ ہونے پر سیمی فائنلز ایک روز کی تاخیر سے کروانے کا فیصلہ کیا گیا، حالات بہتر نہ ہونے پر فیصلہ غیر معینہ مدت کیلئے ملتوی کردیا گیا تھا۔ ذرائع کے مطابق دھرنا ختم ہونے کے بعد سیمی فائنلز آج جبکہ فائنل کل کروایا جائے گا جو کھلاڑی گھروں کو روانہ ہوگئے تھے میچز کیلئے واپس آجائیں گے۔واضح رہے کہ شیڈول کے مطابق قومی ٹی ٹونٹی27نومبر کو مکمل ہونے کے بعد قائد اعظم ٹرافی ٹورنامنٹ کا سپر8 مرحلہ 29نومبر کو شروع ہونا تھا، تاہم اب قومی ایونٹ کی تکمیل کے بعد قائداعظم ٹرافی کا سپر 8 مرحلہ شروع ہو گا، ایونٹ کے جلد نئے شیڈول کا اعلان متوقع ہے۔